Избирачките места во Грузија беа отворени денеска наутро на парламентарните избори, кои се сметаат за одлучувачки за европската иднина на земјата.
Во изборната кампања доминираа надворешнополитички теми и меѓусебни обвинувања за клевета.
Некои Грузијци се пожалија на заплашување и притисок да гласаат за владејачката партија Грузиски сон, која опозицијата ја обвини дека води „хибридна војна“ против нејзините граѓани.
Пред изборите, Бидзина Иванишвили, милијардерот кој го основа Грузискиот сон и го стекна своето богатство во Русија, повторно вети дека ќе ги забрани опозициските партии доколку победи неговата партија.
„Грузиски сон ќе ги смета опозициските партии „целосно одговорни според целосната сила на законот за воените злосторства извршени врз народот на Грузија“, рече Иванишвили на митинг во Тбилиси во средата.
Тој не објасни за кои злосторства ја смета одговорна опозицијата.
Тој претходно додаде дека Грузија ќе стане членка на ЕУ „само достоинствено“ и дека не смее да војува со Русија или да воведува санкции кон Москва.
Многу Грузијци веруваат дека овие парламентарни избори може да бидат најважниот глас во нивниот живот, бидејќи тие ќе одредат дали Грузија ќе го следи патот кон ЕУ или дали ќе го прифати авторитаризмот и руското влијание.
Според анкетите, околу 80 отсто од Грузијците се за влез во ЕУ, а Уставот на земјата ги обврзува нејзините лидери да се стремат кон членство во Унијата и НАТО.
Но, Брисел го стави во мирување процесот на пристапување на Грузија во ЕУ, откако владејачката партија Грузиски сон во јуни го усвои „рускиот закон“ со кој се ограничува слободата на говорот.
Многу Грузијци стравуваат дека партијата ја влече земјата кон авторитаризам и ги убива надежите дека може да се приклучи на ЕУ.