Зубин Мехта е индиски диригент со светско реноме. Тој стана синоним за извонредно диригирање, со кариера која се протега повеќе од шест децении.
Мехта е роден на 29 април 1936 година во Бомбај (сега Мумбај), а неговото музичко патување започна рано, под влијание на неговиот татко Мехли Мехта, диригент и основач на Бомбајскиот симфониски оркестар.
Како млад, Зубин ги напуштил медицинските студии во Индија за да се посвети на музиката, што се покажало како клучна пресвртница во неговиот живот.
Заминал во Виена, каде студирал на Музичката академија кај познати професори, како што е Ханс Сваровски. Мехта брзо покажа талент и посветеност, што го донесе на сцените на светските оркестри.
Еден од најзначајните моменти во неговата кариера беше неговото назначување за музички директор на Израелската филхармонија во 1969 година. Мехта беше именуван доживотен музички директор во 1981 година, што е речиси без преседан во светот на класичната музика.
Под негово водство, оркестарот постигна меѓународна слава, а Мехта често ја користеше музиката како мост меѓу различните култури и народи.
Покрај неговата соработка со Израелската филхармонија, Мехта беше и главен диригент на Њујоршката филхармонија во 1978 година, останувајќи на таа позиција 13 години.
Тој исто така одигра важна улога во Филхармонијата во Лос Анџелес, каде што беше уметнички директор и главен диригент од 1962 до 1978 година.
Диригирал во најпознатите оперски куќи во светот: Монтреал, Чикаго, Метрополитен опера, Виенската државна опера, Баварската државна опера, операта Ковент Гарден, Ла Скала, Германската опера во Берлин, фестивалот во Салцбург.
Зубин Мехта го водеше виенскиот новогодишен концерт пет пати: 1990, 1995, 1998, 2007 и 2015 година.
Покрај наградуваната кариера, Зубин Мехта е познат и по својот космополитски дух и неверојатна посветеност на музиката. Иако е роден во Индија, поголемиот дел од животот го поминал во Европа и Америка.
Зубин Мехта има соработувано со некои од најпознатите светски музичари. Диригирал бројни концерти со Павароти, Пласидо Доминго и Хозе Карерас, особено за време на популарната изведба на Тројцата тенори.