Рускиот претседател Владимир Путин нареди есенско регрутирање на нови 133 илјади војници, што треба да се изврши од вторник, 1 октомври, до крајот на оваа година.
Указот од Кремљ го објави рускиот државен весник Росискаја газета. Уредбата бара да се спроведе регрутирање на граѓани на возраст меѓу 18 и 30 години, кои не се во резерва, а кои, според сојузниот закон, подлежат на регрутирање во број од 133 илјади лица.
Шефот на руската канцеларија за регрутирање, вицеадмирал Владимир Цимлијански, потврди дека условите за регрутирање остануваат исти – 12 месеци стаж во воените единици во Русија.
„Би сакал да нагласам дека регрутите нема да бидат поканети да учествуваат во специјална воена операција во нови области“, изјави Цимлијански, цитиран од весникот „Росискаја газета“.
Русија официјално ја нарекува сеопфатната воена инвазија на соседна Украина, која ја започна во февруари 2022 година, „специјална воена операција“.
Во септември, Путин, мислејќи на заканата за западните граници на Русија, нареди проширување на редовите на руската армија за 180.000 војници, со што вкупниот број на активни регрути ќе достигне 1,5 милиони. Овој чекор би значел дека Русија ќе ја има втората по големина армија во светот, веднаш по Кина.
Недостигот од руски воен персонал се наведува како клучен фактор за успехот на ненадејниот упад на Украина во руската област Курск, кој започна на 6 август.
Москва се обиде да избегне зајакнување на одбраната во регионот Курск со војници кои се борат во источна Украина и наместо тоа се потпира на единици од други региони за да ја запре оваа украинска офанзива на руска територија.