Словачкиот премиер Роберт Фицо изјави дека нацистичките трупи се борат во Украина, но дека меѓународната заедница тоа не го забележува.
„Сите зборуваме за фашизам, нацизам, а во исто време тивко толерираме војници со многу јасна етикета да трчаат низ Украина, поврзани со движења кои денес ги сметаме за опасни и забранети. Бидејќи ова е геополитичка битка, тие никому не му пречат“, рече Фицо при посетата на Музејот на холокаустот во словачкиот град Серед, пренесува ТАСР.
Фицо посочи дека светот е полн со лаги, бидејќи, како што наведе, „од една страна меѓународната заедница зборува за злосторства, а од друга сè повеќе прави компромиси со кои се навредува положбата на жртвите на холокаустот и расното насилство“.
„Меѓународната заедница мора да признае дека е невозможно да им дозволи на војниците кои користат нацистички симболи и често се однесуваат соодветно да се борат во Украина“, додаде словачкиот премиер.
Министерството за надворешни работи на Украина соопшти дека Киев е разочаран од изјавата на премиерот на Словачка Роберт Фицо за војниците на вооружените сили на Украина, која, како што велат, „противречи на постојното ниво на доверба и соработка меѓу Украина и Словачка“.