Претседателот на Владата на Република Македонија Никола Груевски, доцна вечер по македонско време, ќе се обрати пред 68. Генерално собрание на ОН во Њујорк.
Предвидено е тој утре, да се сретне и со генералниот секретар на Светската организација Бан Ки-мун.
Премиерот Груевски, во САД предводи владина делегација која во рамките на економскиот дел од посетата одржа повеќе бизнис форуми.
Делегацијата има и повеќе поединечни средби со претставници и менаџерски тимови на американски компании кои се потенцијални инвеститори во Македонија, како и со останати субјекти од САД кои учествуваат во сферата на економијата.
Тој ја посети и корпорацијата Форбс каде што со потпретседателот на корпорацијата, Кристофер Форбс беше потпишан Договор за соработка на полето на привлекувањето на странските инвестиција.
Во рамки на посетата на САД, премиерот Груевски во придружба на министерот за здравство Никола Тодоров, посети и повеќе медицински центри, болници и здравствени капацитети во Принстон, Чикаго и Бостон, каде имаше средби со нивните менаџерски тимови, во насока на разгледување на можностите за остварување соработка помеѓу македонските и американските здравствени установи или конкретизација на соработката како резултат на претходно остварени контакти.