Состојбата со индустриите во ЕУ е загрижувачка, при што најголеми загуби се забележани на план на продуктивноста и вработувањето, предупреди ЕУ.
Во двата одвоени извештаи за конкурентност, Комисијата ја покажа лошата слика на европските индустрии, погодени од падот на инвестициите и анемичната внатрешна побарувачка, пренесе „Франс прес“.
Во извештајот се укажува на големите разлики, кои што постојат помеѓу државите, наведувајќи ја за пример најдинамичната држава, Германија и јужните држави кои што заостануваат зад неа.
-Покрај тоа, трошоците за енергија растат речиси кај сите членки, што предизвикува деиндустријализација на Европа-се додава во извештајот.
Ова прашање е од голема важност за европските држави, кои што се соочени со честите затворања на фирмите и исчезнувањето на цели сектори за вработување.
-Оживувањето на слабите индустрии може значајно да помогне во враќањето на Европа на солиден стопански раст-стои во извештајот.
Европската унија претходно постави амбициска цел за враќање на индустријата на 20 проценти од целокупниот бруто домашен производ, но летово целта ја намали на 15 проценти.
-Далеку сме од нивото кое што постоеше пред кризата. А што се однесува до продуктивноста, која некогаш беше силна точка на мнозинството европски држави, Европа сега заостанува зад САД и Јапонија. Многу европски држави се погодени со низа проблеми, меѓу кои и комплицирана администрација и неадекватна инфраструктура-изјави европскиот комесар за индустрија, Антонио Тајани.
Елена Георгиевска