Владимир Путин донесе одлука да одговори на упадот на Украина во Русија, изјави рускиот амбасадор во САД. „Искрено ви кажувам дека претседателот донесе одлука“, изјави Анатолиј Антонов, а јави руската државна новинска агенција ТАСС.
„Цврсто верувам дека сите ќе бидат строго казнети за она што се случи во областа Курск“, рече Антонов, но не откри дополнителни детали за плановите на Путин.
Вчера во Кремљ се одржа состанок на високи функционери, на кој учествуваа Путин и гувернерите на пограничните региони, поради украинската инвазија во областа Курск. На средбата се разговараше за ненадејниот упад на Украина во руската област Курск, кој трае повеќе од две недели.
Тоа е најголемиот упад на странска воена сила во Русија од Втората светска војна.
Рускиот амбасадор Антонов додаде дека САД планираат да ги отстранат сите ограничувања за употребата на оружјето доставено до Украина.
„Тие во суштина го поставија теренот за одлука едноставно да се отстранат сите постоечки ограничувања во одреден момент, без многу размислување“, рече тој.
САД и обезбедија на Украина воена помош во вредност од повеќе од 55 милијарди долари од 2022 година, но не и дозволија на Киев да користи оружје со долг дострел на руска територија, освен ако не се користи за одбранбени прекугранични операции или одмазднички оган.