Станбено-деловен објект во вредност од 3,5 милиони евра, почна да се гради во центарот на Гевгелија на локацијата на старата автобуска станица.
Проектот предвидува на овој простор да никне зграда висока 22 метри со корисна површина од околу 10.000 метри квадратни. На два ката под земјата ќе се градат гаражи,во приземјето ќе има супер маркет и други трговски единици, а на седум ката и во поткровјето ќе се изградат 50 станови кои ќе бидат понудени на продажба.
Градоначалникот на општина Гевгелија Иван Франгов, нагласи дека за општината ова е значајна инвестиција која потврдува дека политиката на локалната самоуправа за урбанизација е исправна.
– Ако не ги носевме урбанистичките планови, проектот немаше да се реализира. Изградбата на објектот ќе претставува поттик за натамошниот развој на стопанството и економијата во нашата општина, истакна Франгов и додаде дека општина Гевгелија секогаш ќе подржува такви проекти и ќе обезбедува услови за нивна реализација.
Градежните работи ги извршува фирмата „Мансард“ од Гевгелија, која во рок од три години треба да го изгради станбено-деловниот објект.