Пожарот на планината Серта од рано утринава се гаси од земја и воздух. Ангажирани се стотина припадници на Армијата, припадници на Министерството за внатрешни работи, ловџии, шумски работници. Интервенираат и полициски хеликоптер и два армиски хеликоптери.
Стотина припадници на Армијата и два хеликоптера МИ 8/17 од воздухопловниот ВИНГ од раните утрински часови во координација со сите инволвирани субјекти отпочнале со координиран и насочен ангажман во гаснењето на пожарот во поширокиот реон на неготинско и планината Серта.
– По наредбата од претседателката и врховен командант на Вооружените Сили, Гордана Сиљановска Давкова за ангажирање на Армијата за справување со пожарите во реонот на неготинско, началникот на Генералштабот, генерал-потполковник Васко Ѓурчиновски нареди ангажирање на потребни капацитети на Армијата, информираа утринава од Генералштабот на Армијата.
Владата доцна синоќа по барање на Кризниот штаб од Неготино прогласи кризна состојба.
– Тука сме кавадаречки и неготински пожарникари, ловџии, припадници на МВР, летаат дронови проверуваат терен, дојде помош и од страна, пристигна едно возило од Пехчево, од подружницата на ,,Национални шуми” од Демир Капија. Вообичаено, при вакви пожари, распалувањето на огнот е со покачување на температурата во воздухот, околу пладне, велат пожарникари од терен во изјава за МИА.
Пожарот избувна во средата околу 10.30 часот, а синоќа Кризниот штаб од Неготино побара прогласување на кризна состојба по што Владата донесе одлука.
Покрај пожарот на планината Серта, активни се и пожарите над селото Бадилен, во месноста Шамок во општина Ново Село, меѓу селата селата Негорци и Кованец во општина Гевгелија, меѓу селата Горни и Долни Липовиќ во општина Конче, меѓу селата Дреново и Долно Јаболчиште во општина Чашка, над селото Црнилиште во општина Долнени и меѓу селата Драгоево и Селце во општина Штип.
Податоците што вчера ги објави ЦУК говорат дека само за 12 дена во јули имало вкупно 173 пожари на отворен простор од пошироки размери.