Европската фудбалска федерација (УЕФА) покрена дисциплинска постапка против Фудбалскиот сојуз на Србија поради однесувањето на навивачите на неодамнешниот натпревар против Англија во првото коло на Европското првенство во Германија.
Имено, англиските медиуми пишуваат дека УЕФА покренала истрага против „орлите“ откако биле пријавени мајмунски крици насочени кон англиските играчи.
УЕФА назначи инспектор кој ќе води дисциплинска постапка во врска со наводното дискриминаторско однесување пријавено од сведок на трибините во текот на првото полувреме од натпреварот.
UEFA launch investigation into claims that monkey noises were aimed at England players during 1-0 victory against Serbia at Euro 2024 https://t.co/zuJ5yFEwjH
— Mail Sport (@MailSport) June 17, 2024
Освен оваа истрага, УЕФА го обвини Фудбалскиот сојуз на Србија за уште два прекршоци – фрлање предмети и пренесување на провокативна порака несоодветна за спортски настан.
Последното обвинение се однесува на истакнување на знаме поврзано со паравоено движење вклучено во етничко чистење за време на војните во поранешна Југославија.
„Етичкиот и дисциплинскиот инспекторат на УЕФА ќе спроведе дисциплинска истрага за наводното дискриминаторско однесување“, изјави портпаролот на УЕФА.
Инаку, инцидентот се случил пред околу 50.000 гледачи, меѓу кои имало и околу 8.000 српски навивачи.