Американски авиони-ловци вчера над реонот на Њујорк пресретнале најмалку три мали летала, кои навлегле во ограничениот воздушен простор над седиштето на ОН и биле изведени надвор од него.
Портпарол на Командата за заштита на воздушниот простор соопшти дека вчера попладне во рок од час и половина, имало најмалку три инциденти на небото над Њујорк.
Тој дополни дека ловци Ф-16 пресретнале три мали авиони и ги испратиле до зоните што им биле одобрени од Контролата за летање, по што биле приземјени и претресени.
Според истиот извор, нема основан сомнеж дека тоа биле терористички закани.
Дел од воздушниот простор над Њујорк е затворен за сообраќај поради 68-та сесија на Генералното собрание на ОН, во која учествува и американскиот претседател Барак Обама.