Заменик-претседателот на СДСМ Радмила Шекеринска денеска и утре престојува во дводневна работна посета на Холандија.
Во текот на денешиот ден, Шекеринска ќе има средба со претставници од Лабуристичката партија во Парламентот на Холандија, а потоа во Хаг ќе се сретне со пратениците Мајкл Серваес, претставник за надворешни работи и Марит Маиј, претставник за европски прашања во Холандскиот парламент.
Во Министерството за надворешни работи најавено е дека Шекеринска ќе има средби со Барбара Плечер од Одделот за човекови права и мултилатерални организации, со Адиен Велрусио од Одделот за евро-интеграции и со Рој Ханс, од Одделот за Европа при Министерството за надворешни работи. На средбите, како што информира СДСМ, ќе стане збор за евроинтеграцискиот процес на Република Македонија и состојбите во ЕУ и регионот.
Шекеринска ќе учествува и на експертскиот состанок на кој ќе се разговара за процесот на проширување на ЕУ, реформите, владеењето на правото и демократизацијата во Македонија и Западен Балкан.
