Украинскиот претседател Володимир Зеленски потпиша два закони за продолжување на вонредната состојба и општа мобилизација за уште 90 дена.
Двете мерки беа продолжени до 15 ноември. Зеленски првпат прогласи вонредна состојба и општа мобилизација на 24 февруари 2022 година, кога Русија ја започна својата целосна инвазија на Украина. Оттогаш и двете мерки беа неколкупати продолжени.
Според вонредната состојба, Украинците на возраст меѓу 18 и 60 години, со некои исклучоци, не смеат да ја напуштат земјата бидејќи би можеле да бидат повикани на воена служба.
Зеленски денеска одржа и состанок за снабдување и производство на оружје, за тактичките и стратешките планови на Русија, како и за подготовката на украинскиот систем за воздушна одбрана и енергија за претстојната зима.
Претседателот разговараше со владини претставници за елиминирање на последиците од руските напади, евакуација од областа Купјанск и помош на жртвите на руската агресија во неколку региони.
Во својата објава на Телеграм, Зеленски додаде дека Киев подготвува нови чекори за да обезбеди континуирана работа на привремениот коридор на Црното Море, кој беше лансиран за да се овозможи премин на бродови откако Русија еднострано го раскина договорот за жито со посредство на ОН.
Првиот цивилен брод исплови од украинското пристаниште Одеса низ хуманитарниот коридор на 16 август.