Професор доктор Вулнет Амети е новиот ректор на Државниот универзитет во Тетово, информираше денеска портпаролот на ДУТ Сељам Сулејмани.
Одлуката денеска ја донел Сенатот на ДУТ откако на вчерашната седница на ректорската управа биле официјализирани кандидатурата на Амети и неговиот противкандидат професор д-р Фаузи Скендери.
Од вкупниот број членови на Сенатот за Амети гласале 22 додека еден глас бил прогласен за неважечки од страна на тричлената изборна комисија на чело со професор д-р. Хајри Зиба. Мандатот на Амети како ректор ќе трае четири години.
Според Сулејмани, под раководство на сега актуелниот ректор Амети во изминатата година додека тој бил вршител на должност направен е голем напредок во повеќе насоки како во меѓународната афирмација на Универзитетот, реформа на наставните планови и програми, спроведување на Европскиот кредитен транфер ситем, размена на студенти и наставен кадар со меѓународните универзитети, создавање на модерна инфраструктура и зголемување на ефикасноста и квалитетот на студиите, проширување на мрежата на дисперзираните студии во многу градови на земјата, како и создавање на просторни услови за квалитетно одвивање на наставно-научниот процес, инаугурација на новата зграда на Универзитетот во Тетово.
Реализирани биле и многу други проекти кои ја подигнуваат оваа високообразовна институција на ниво на најпрестижните универзитети на државно, регионално и меѓународно ниво.