Чеченскиот лидер Рамзан Кадиров изјави дека Адам Делимканов, еден од неговите високи команданти, е жив и здрав, отфрлајќи ги информациите дека бил убиен или ранет во Украина. Кадиров, близок соработник на Путин, кој е на чело на Чеченија, денеска на Телеграм изјави дека Делимканов е „жив и здрав, па дури и не е ранет“.
Тој додаде дека од почетокот на „нападот со лажни информации“ знаел дека Делимканов е добро, но молчел за да ги посрамоти украинските медиуми кои известуваат за наводната смрт на командантот. Имено, на украинските социјални мрежи се појавија непотврдени гласини дека чеченскиот командант бил убиен при артилериски напад.
Потоа, Кремљ соопшти дека е „загрижен“ од сè уште непотврдените медиумски извештаи дека висок чеченски командант бил ранет во Украина, додавајќи дека „чека разјаснување“ за тоа што навистина се случило.
Делимканов, кој е пратеник во рускиот парламент и командант на чеченскиот огранок на руската национална гарда, се смета за втор највисок функционер во Чеченија, по сојузникот на Путин Рамзан Кадиров.