Ако барате виновник, можете да „пукате“ по мене, а кошаркарите се трудеа и се бореа и можат да се вратат со кренати глави, изјави селекторот на македонската репрезентација, Алеш Пипан по поразот од Летонија.
Со поразот, репрезентацијата се враќа дома, а Пипан ќе остане во својот дом, во Словенија. Македонија Евробаскет 2013 го завршува со скор од 1 победа и четири порази во групната фаза.
– Можеби нема да биде комплетна анализата со жешки глави, меѓутоа јасно е дека не успеавме. Ќе треба да ги погледнеме натпреварите и да видиме каде грешевме. Но, факт е дека неправдата против Црна Гора многу не погоди и не исфрли од колосек. Ако барате виновник, можете да „пукате“ по мене, а кошаркарите се трудеа и се бореа и можат да се вратат со кренати глави. Се чини дека многу ни недостигаше и Ѓорѓи Чековски, кој се повреди во незгоден момент, и со него многу загубивме во битката под кошевите. Тој ги мина целите подготовки и ни беше еден од најдобрите играчи, посебно во одбраната. Најслабиот натпревар го одигравме против БиХ, а не успеавме да се вратиме во ритам ниту против Летонија – изјави Пипан, и им честиташе на Летонија за заслужената победа.