Денеска официјално започнаа активностите за уредување на новиот мултифункционален комплекс, лоциран на „Островска“ во Лисиче. После долг временски период, граѓаните од овој дел на Аеродром, добиваат нов простор за спорт, рекреација, прошетка и исполнување на слободното време. Еден стар и запуштен дел од Аеродром, конечно ќе добие нов, модерен и современ изглед.
„Токму денеска, на оваа локација присуствувавме на официјалното отпочнување на активностите за реконструкција и осовременувањето на спортскиот терен, како и уредувањето на околниот простор што опфаќа изведба на детско игралиште, поставување на павер елементи, клупи, модерно лед – осветлување, пешачка патека и нови садници во целиот простор. Комплекс кој треба да овозможи содржини за сите возрасти, за спортистите, рекреативците, но и оние кои уживаат во мирниот маалски живот во Аеродром“, напиша градоначалникот Муцунски на својата Фејсбук страна.
Реализирањето на оваа нова капитална инвестиција е целосно финансирана од Буџетот на општината и таа е дел од пролетната градежна офанзива за позелена, поурбана и поубава општина, велат од Општината Аеродром.