Победа од 10 или повеќе поени разлика против исклучително незгодната Летонија е единствената варијанта која ја остава Македонија во игра за пласман во следната фаза. Нашата репрезентација денеска ќе го одигра последниот натпревар во Јесенице, а почнува од 14.30 часот.
Вчерашниот пораз од Босна и Херцеговина сериозно наштети на шансите за продолжување на Евробаскетот за нашата репрезентација, сепак тие и натаму постојат, па по слабото издание на вчерашниот меч, избраниците на Алеш Пипан сигурно ќе влезат дополнително мотивирани во денешниот натпревар, да го потврдат квалитетот на европската сцена.
Летонија досега се покажа како исклучително незгодна екипа, која покрај тоа што успеа да ги совлада Босна и Херцеговина и Црна Гора во првите две средби, одигра докрај неизвесни натпревари и против фаворизираните Литванија и Србија. Со евентуална победа против нашата репрезентација, Летонците би обезбедиле историски пласман во следната фаза од Евробаскетот, така што јасно е дека денеска може да се очекува максимално борбен и неизвесен дуел.
Селекторот Аинарс Багатскис на располагање има еден компактен состав, во кој тешко е да се посочи од каде пристигнува најголемата закана. Јаниченокс, заедно со Фреиманис и Куксикс се истакнаа како прва опција во нападите, а искусниот плејмејкер Јанис Блумс е диригентот на играта во која впечатлива улога играат и Бертанс, Берзинс и Стрелниекс меѓу другите.
Натпреварот е закажан да почне од 14.30 часот и ќе биде последен за двете репрезентации во Јесенице. Во зависност од резултатот од овој меч, но и од резултатите на останатите натпревари, ќе биде познато која селекција ќе продолжи со своите натпревари во втората фаза во Љубљана. На нашата репрезентација и игра една варијанта, која вели дека само победа со 10 или повеќе поени разлика против Летонија, заедно со победи на Литванија против Босна и Херцеговина, односно Србија против Црна Гора, не носи во следна фаза.