Грчката полиција го истражува случајот со мртвото бебе, чие тело вчера е пронајдено закопано недалеку од Лариса.
Целиот случај e откриен кога жена (38) пристигнала во болница со силни болки и обилно крварела. При прегледот лекарите констатирале дека жената неодамна се породила, а во матката нашле делови од плацентата.
Жената која добила сепса упорно негирала дека е бремена и не сакала да одговори на лекарското прашање.
Веднаш била повикана полиција, која набрзо открила дека жената се породила во бањата од нејзиниот дом во Лариса, а потоа го фрлила бебето во ѓубре. Грчките медиуми јавуваат дека родителите на родилката потоа го извлекле новороденчето од контејнерот и го однеле на околу два километри од селото, каде што го закопале детето во нива сопственост на семејството.
Полицијата вчера излегла на местото на настанот со членовите на семејството на родилката и почнала да го ископува телото на бебето.
Извор од истрагата открива дека се работи за момче кое се здобило со удари во главата. Сепак, првите сознанија укажуваат дека детето е мртво родено.
Направена е обдукција и се чекаат дополнителни наоди за да се утврди како починало бебето.