„Нема место во источниот град Бахмут кое не е облеано во крв“, рече украинскиот претседател Володимир Зеленски во денешната изјава.
Тој додаде дека само неколку цивили останале во градот, каде пред војната со Русија живееле 70.000 луѓе.
„Нема час кога не се слуша страшниот звук на артилерија. Сепак, Бахмут стои“, рече Зеленски.
Градот во источниот регион на Доњецк со месеци трпи немилосрдни борби. Руските трупи се обидуваат да навлезат во областа и прават напори да преземат целосна контрола над Донбас, потпирајќи се најмногу на платеници.
Зеленски го посети Бахмут претходно во декември и го опиша градот како „украинска тврдина на линијата на фронтот“. Битката во Бахмут стана една од најжестоките во војната досега, а жителите и во зимски услови беа принудени да се засолнат под земја.
Некои воени аналитичари велат дека Бахмут е од мала стратешка вредност за Русија, но други тврдат дека неговото заземање ќе го отвори патот кон Славјанск и Краматорск – два важни индустриски центри.