Во пресрет на новогодишните и божиќните празници, Општина Аеродром заедно со училиштата и градинките од својата територија оваа година ја продолжува традицијата на организирање новогодишни хуманитарни базари.
Со настап на музичарите Викторија Лоба, Лара Иванова, Сара Мејс, Фиц и Студени нозе, Ди Џеј Тодороф, како и магионичарско шоу, новогодишна претстава со Дедо Мраз, танцови настапи на АQUA DANCE и Break a leg и Светот на Биби, зад трговскиот центар „Капитол мол“ во Општина Аеродром ќе се одржи дводневен новогодишен хуманитарен базар фест насловен „Подари среќа“(28-29.12.2022).
Во рамките на хуманитарниот настан „Подари среќа“ ќе биде организиран базар, на кој посетителите ќе можат да купат новогодишни честитки и рачни изработки на децата од градинките и училиштата од прво до петто одделение во основните училишта на територијата на Општина Аеродром. Со средствата што ќе бидат собрани од оваа акција ќе бидат помогнати семејства од социјално-ранливите категории на територија на Аеродром.
„Овој предновогодишен хуманитарен настан е можност за сите граѓани на Општина Аеродром, но и за сите посетители кои ќе бидат наши гости овие два дена да направат добро дело и да помогнат. Сакам да се заблагодарам на децата, но и на вработените во градинките и училиштата низ Аеродром кои секогаш даваат поддршка и се вклучуваат во хуманитарни активности со кои се помага на семејствата од социјално-ранливите категории. Новогодишните и божиќните празници се уште една можност да докажеме дека хуманоста не познава граници, причина да подариме среќа на оние на кои им е најпотребно на почетокот на новата година“, изјави градоначалникот на Општина Аеродром, Тимчо Муцунски.
Општина Аеродром ги поканува граѓаните да го посетат базарот, да се израдуваат себеси и најблиските со уникатни подароци, а воедно и да учествуваат во уште една хуманитарна акција.