Министерството за внатрешни работи во содејство со Царинската Управа пресече меѓународен канал на недозволена трговија со хероин од Турција преку Грција и Македонија со крајна дестинација западно европските земји. Запленети се 2,43 килограми високо квалитетен хероин, а од слобода се лишени две лица. Наркотичната дрога доколку би се продала на нарко-пазарот во Западна Европа би достигнала околу 300.000 евра.
При преземени координирани мерки и активности, вчера попладне околу 12.30 часот, на граничниот премин „Богородица“, при влез во Македонија, извршена е контрола на патничко моторно возило „Цитроен Ц 4“ сопственост на рента-кар компанија од Скопје, управувано од скопјанката А.С.(46).
При контрола во возилото, во багажниот простор, под тапацирите во фабричките празнини е пронајден хероин, спакуван во пет пакувања од по околу половина килограм, по што е одземен и предаден на Одделот за крим-техника заради вештачење.
Според досега документираните сознанија, Д.Ф. го организирал транспортот на хероинот, ангажирајќи ја претходно А.С. како транспортер, и помогнал околу пронаоѓање патничко моторно возило од рент-а-кар компанија од Скопје за одреден временски период за што дал и паричен аванс. По ова, на 27.08.2013 заедно со својата малолетна ќерка и со сопствено патничко моторно возило заминал за Турција, а А.С. во истиот период, исто така заминала за Турција со возилото кое претходно од Д.Ф. било најмено од рент-а-кар компанијата.
По пристигање во Истанбул, Д.Ф. го набавил хероинот и го сокрил во возилото „Цитроен Ц4“ на паркинг просторот пред хотел „Санџак“ каде што престојувал со А.С.
Кон Македонија Д.Ф. патувал со својата малолетна ќерка, во сопствен автомобил, а А.С. го управувала најменото возило и за време на транспортот постојано добивала инструкции од Д.Ф.
Согласно досегашните сознанија на МВР, ваквиот начин на кој Д.Ф. го организирал транспортот на хероинот не бил прв пат. Неговата малолетна ќерка е повторно инволвирана во криминалните активности. Првиот пат, на 28.05.2012, на граничниот премин „Ипсала“, на излез од Турција, при контрола на возило „БМВ“, сопственост и управувано од неговата сопруга, кога сопатници биле неговиот татко и малолетната ќерка, пронајдени се и одземени 38 пакувања со вкупна количина од 19,65 килограми хероин. Неговиот татко и сопругата се на издржување казна затвор во Турција. Освен бескрупулозната злоупотреба на сопствената ќерка, за Д.Ф. е карактеристично и користењето зголемената фрекфенција на граничните премини поради крајот на туристичката сезона.