Украинскиот претседател Володимир Зеленски денеска им порача на лидерите на Г-20 дека меѓу нив има „терористичка држава“ и ја обвини Русија за нападот врз Полска во кој загинаа две лица. Зеленски им се обрати на Граупата преку видео повик и им порача дека нападот врз Полска е „искрена порака од Русија до членките на Г20“.
Ова е второ обраќање на Зеленски на состанокот на Г20. Сепак, некои од лидерите веќе го напуштија индонезискиот остров Бали, кој е домаќин на средбата. Меѓу нив е и рускиот министер за надворешни работи Сергеј Лавров, кој синоќа го напушти Бали. Зеленски им порача на оние кои се уште таму дека меѓу нив има терористичка држава од која Украина се брани. „Тоа е реалноста“, додаде тој.Украинскиот претседател повика на брза реакција на нападот во Полска.
Полска соопшти дека нема докази кои со сигурност можат да потврдат кој ја лансирал ракетата, а американскиот претседател Џо Бајден вели дека „не е многу веројатно“ таа да е лансирана од Русија, која негира дека е одговорна за нападот.
Украинскиот министер за одбрана Олексеј Резников ги забрани летовите над Украина поради нападот. „Побаравме да се затвори небото, бидејќи небото нема граници. Ниту за неконтролирани проектили, ниту за заканата што ја претставуваат за нашите соседи од ЕУ и НАТО. Ги симнуваме ракавиците. Време е за победа“, напиша Резников на Твитер.