Поранешната девојка на Ким Џонг-ун била егзекутирана поради порно-снимка
Севернокорејската пејачка Хјон Сонг-вол, која порано му била девојка на актуелниот лидер Ким Џонг-ум, била егзекутирана од стрелачки одред пред очите на своето семејство поради прекршување на строгите закони за порнографија.
Весникот „Саут Чајна морнинг пост“ наведува дека Хјон и уште 11 члена на популарниот оркестар „Унхасу“ и на групата „Вангхаесан“ – пејачи, музичари и танчери, биле егзекутирани на 20 август, само три дена откако биле уапсени поради прекршување на законот, наводно поради тоа што се снимале додека имале сексуални односи, а потоа илегално ги продавале снимките.
Казната била спроведена со оган од стрелачки вод со автоматско оружје, пред очите на членовите на семејствата на осудените, како и пред другите членови на популарниот оркестар. „Публиката“ веднаш потоа била испратена во „корекциони логори“.
Освен како поранешна девојка на лидерот Ким пред десетина години, Хјон беше позната како членка на групата што сними низа популарни патриотски песни, како „Чекорите на војниците“, „Го сакам Пјонгјанг“ или „Ние сме трупите на партијата“.
Поранешниот лидер Ким Џонг-ил не ја одобрил врската на својот син со пејачката и наредил тие да се разделат. Хјон подоцна се оженила за офицер, но имало и гласини дека таа продолжила тајно да се гледа со Ким Џонг-ун.
Интересно е што и Ри Сол-ју, актуелната „прва другарка“ на Северна Кореја, била член на популарниот оркестар „Унхасу“, пред да се омажи за Ким.
Професорот Тошимицу Шигемура од токискиот универзитет Васеда, тврди дека егзекуцијата е сурова казна за такво дело дури и во Северна Кореја и се сомнева дека случајот има политичка заднина.
– Можеа да направат да исчезнат во затворскиот систем. Сигурно има политичка заднина. Можеби групата била наклонета кон друга политичка фракција во Пјонгјанг. Или, можеби егзекуциите имаат врска со сопругата на Ким, која порано беше во оркестарот – изјави Шигемура.