Министерката за внатрешни работи, Гордана Јанкуловска одговори на барањето на ЛДП за нејзина оставка по усвојувањето на извештајот на комисијата за настаните од 24 декември.
-Процедурата за разрешување и барање оставка на Министер во Владата, согласно Уставот и законите на Република Македонија, која ја знаат и студентите на Правниот факултет, налага покренување на постапка за интерпелација од пратениците кои се заинтересирани да ја иницираат во Собранието на РМ. Смена на министер или министри е можна и преку барање за гласање на доверба на Владата, распуштање на Собранието и распишување на избори.
Разбирам дека СДСМ се плаши од предвремени избори заради преполовување на поддршката од граѓаните и губење на најголем дел од пратениците, но не можам да разберам зошто е стравот од избори на ЛДП која најмалку што може е да го повтори изборниот резултат и добиената доверба од граѓаните, освојувајќи НУЛА пратенички места, се вели во соопштението испратено од МВР.