Во неколку одвоени напади, вчера во Ирак загинаа 48 лица, вклучувајќи и едно осумгодишно дете, а повеќе десетици се повредени, пренесуваат агенциите.
Во близина на Мосул, бунтовниците поставиле лажен контролен пункт, благодарение на кој заробиле и убиле пет војници, соопшти полицијата.
Во Мосул е убиен и еден продавач, но за сега не е познат мотивот за убиството.
Во северниот дел на Ирак, во градот Балад, во експлозија на автомобил бомба загинаа три медицински сестри и еден случаен минувач, а уште 13 лица се повредени, вклучувајќи и еден судија, за кого се претпоставува дека бил мета на нападот.
Во багдадската населба Ал Амин, во експлозија на автомобил бомба на еден пазар, загинаа три, а повредени се 13 лица, соопшти полицијата.
Уште три цивили загинаа, а шест се повредени во бомбашки напад во багдадската населба Зајона, а две лица загинаа и седум се повредени во трговскиот центар во областа Газалија.
На 25 километри од Багдад, во Мадаин, во уште една експлозија на автомобил бомба се убиени четири, а повредени 12 лица.
Во бомбашки напад во близина на Бакубе, загина и едно осумгодишно момче, а 11 лица се повредени.
Повеќе од 3.000 лица загинаа во насилствата во Ирак во последните неколку месеци.
Елена Георгиевска