Најавено е носењето на новиот Кривичен законик, во чие креирање работење и министерот за правда Никола Тупанчески. Во интервју за „А1он“ тој открива дали и натаму обвинителите ќе можат да прават спогодби како што беше во случајот „Империја“, каде се досудени три години затвор, за затаен имот вреден над 30 милиони евра. Зборува и за тоа колку лесно или тешко ќе застаруваат кривичните дела, но и дали со него ќе се донесе правда.
Досега, обвинителите и судиите сами толкуваа одредби од актуелниот Кривичен законик. Тупанчески вели дека не може да се предвидат сите ситуации за да се вметнат, па ваквата пракса, како и во светот, ќе продолжи и во Македонија, но ќе се намали можноста.
Во интервјуто, тој зборува и за корумпираноста на судиите, обвинителите и купувањето на правдата со пари. Кажува дека останува на ставот дека случајот „Рекет“ требало да биде проширен и на други лица, став кој го имаше пред три години.
За обвинувањата дека преместувањето во затворите, за да осуденици добијат подобри услови се купува со по 4-5 илјади евра, кажува дека ги чул и тој. Најавува одговорност и зборува за тоа што ќе следува.
Тупанчески, како правник и кривичар, говори и за актуелни судски случаи каде има човечки жртви како што се пожарот во тетовската модуларна болница, автобуската несреќа кај Ласкарци, изгорениот автобус во Бугарија.
За тоа кој и како дели правда во Македонија, но и за неговите дружби со судии, погледнете од разговорот со Никола Тупанчески.