Денеска во Скопје почина славната Невенка Кочовска, која своевремено беше дел од познатиот ансамбл „Мањифико“. Таа долги години боледуваше од Алцхајмер.
Невенка е мајка на популарните пејачки Тања и Лидија Кочовски.
Таа и нејзиниот сопруг Панче беа дел од ансамблот „Мањифико“, формиран во 1959 година и постоел до 1990 година. Групата изведувала латиноамериканска музика.
„Мањифико“ е формиран од Пантелеј Кочовски-Панче и Крсто Таушанов, тогаш ученици во Средното музичко училиште во Скопје, додека биле на младинска работна акција во Демир Капија, на јужната делница од автопатот Братство-единство, за да настапат на приредба.
Подоцна од бригадирите им се придружил Сергеј Поповски, гитарист, од музичкото училиште. Во 1960 година во музичкото училиште ја откриваат Невенка Арсова и нејзиниот прекрасен глас. Таа година квартетот го добива името „Мањифико“.
Во текот на 31-годишното постоење „Мањифико“ настапил во 37 земји на сите континенти, имал 3.700 концерти и 600 добротворни настапи, кои ги посетиле преку 7 милиони гледачи. И дискoграфската продукција на „Мањифико“ е импозантна: 28 мали грамофонски плочи, 5 албуми, 4 аудио касети, 1 видеокасета, 3 аудио компакт-дискови и 1 ДВД, речиси сите продадени во златен или сребрен тираж.