Грција за наредниот месец ќе ги удвои субвенциите за електрична енергија за домаќинствата и малите и средни бизниси, на вкупно 1,9 милијарди евра, најави денеска министерот за енергетика Костас Скрекас.
Сметките за електрична енергија во Грција нагло пораснаа, поттикнати од зголемените цени на гасот, последица на војната во Украина и европските санкции против Русија што го отежнаа снабдувањето со тој енергенс.
„Актуелната војна (во Украина) драматично ја влошува енергетската криза“, рече министерот Скрекас во изјавата за телевизиските станици.
Од септември минатата година Атина има потрошено околу осум милијарди евра за субвенции за струја и други мерки насочени како помош за домаќинствата, бизнисите и земјоделците.
Субвенциите предвидени како помош за наредниот месец ќе изнесуваат околу 1,9 милијарди евра и ќе апсорбираат до 94 отсто од зголемувањето на месечните сметки за струја за домаќинствата и 89 отсто од зголемувањето за малите и средни претпријатија, најави Скрекас.
Тој појасни дека субвенциите за домаќинствата ќе изнесуваат 639 евра за мегават час.
Извор: МИА