Саудиска Арабија и нејзините партнери во Советот за соработка во Персискиот залив нема да ја поддржат намерата на Западот да ги ограничи цените на руската нафта на глобалниот пазар.
Ова за Тас го изјави Мохамед Диаб, експерт за светска економија во либанскиот институт за економски студии.
„Ерата кога нафтените монархии беа подготвени да одговорат на секое барање на Соединетите Американски Држави и Западот заврши. Модерната политичка елита во земјите на GCC води балансирана политика и е заинтересирана за одржување на партнерствата со Русија, па реакцијата на извозниците на арапската нафта од Саудиска Арабија до Алжир, на таа одлука ќе биде негативна“, рече Диаб.
Според него, тешко е да се замисли како учесниците на самитот на Г7 во Елмау ќе можат да го спроведат својот план за лишување на Русија од дел од извозниот профит.
„Очигледно е дека за Организацијата на земјите извознички на нафта (ОПЕК), која има заедничка стратегија со Русија за стабилизирање на ситуацијата на светските пазари, оваа иницијатива е непрофитабилна, нагласи Диаб.
Тој додаде дека со овој чекор Западот се заканува да предизвика хаос и дека е насочен кон уништување на механизмот на прилагодување на цената на нафтата во рамките на групата ОПЕК +.
Либанскиот аналитичар процени и дека Индија и Кина, кои купуваат големи количини сурова нафта и нафтени деривати од Русија, нема да ги поздрават напорите на Г7 да ја принуди Русија да ја продава својата нафта по пониски цени.
Претседателката на Европската комисија Урсула фон дер Лајен и претседателот на Европскиот совет Шарл Мишел најавија планови за ограничување на цените на руската нафта на самитот на Г7 во Елмау.
Според Мишел, за тоа е потребна поширока коалиција во која би биле вклучени и други земји, а не само ЕУ и САД.