Руските сили продолжија да го напаѓаат подрачјето околу Северодоњецк во источна Украина со тешка артилерија и ракети, соопшти утрово украинската армија.
Главниот штаб на украинската армија призна дека нивните сили претрпеле пораз во населбата Метолкине, југоисточно од Северодоњецк, клучен град во областа Луганск, кој Русите се обидуваат да го освојат со недели.
„Непријателот постигна делумен успех благодарение на тешкиот артилериски оган и пешадискиот напад“, соопшти синоќа украинската армија.
Серхи Хајдаи, украинскиот гувернер на областа Луганск, на својот канал Телеграм објави за „тешките борби“ во Метолкине.
Повикувајќи се на проруските сепаратисти, руската прорежимска новинска агенција Тасс објави дека „многу украински борци се предале во Метолкинe“.