Само Украина има право да одлучува за својата иднина, изјави полскиот претседател Анджеј Дуда пред украинските пратеници во Киев.
– Имаше загрижувачки изјави во кои се наведува дека Украина треба да ги исполни барањата на (рускиот претседател Владимир) Путин. Само Украина има право да одлучува за својата иднина. Ниту една одлука за вас не може да се донесе без вас, им порача Дуда на украинските пратеници.
– Меѓународната заедница мора да бара целосно повлекување на Русија од територијата на Украина – аргументираше полскиот претседател во Врховната рада на Украина.
– Ако Украина биде жртвувана поради економски причини или политички амбиции, дури и сантиметар од нејзината територија, тоа ќе биде огромен удар не само за украинската нација, туку и за целиот западен свет, истакна Дуда.
Дуда, исто така, рече дека ништо не може да ја наруши солидарноста меѓу неговата земја и Украина. Тој нагласи дека Полска е силен поддржувач на строги санкции против Русија и силно го поддржува членството на Украина во ЕУ. – Нема да мирувам додека Украина не стане членка на Европската унија, најави полскиот претседател.
Неговиот говор беше проследен со чести аплаузи од страна на украинските парламентарци.
Полска прими околу 3,5 милиони луѓе кои побегнаа од соседна Украина од вкупно 6,5 милиони кои досега заминаа од својата татковина поради конфликтот.
Украинскиот парламентарец Роман Хришчук подоцна објави дека Киев бил нападнат од руски ракети по говорот, принудувајќи ги пратениците да се засолнат.