На 13-те факултети на Универзитетот „Гоце Делчев“ во Штип денеска почна пријавувањето за упис во прва година во студиската 2013/2014 година. Првиот уписен рок ќе трае и утре и задутре.
Слободни места има за 5.083 идни студенти, од кои 2.961 за редовни во државна квота, 1.127 во квота за редовни со кофинансирање на студиите и 995 за вонредни студенти.
Проректорот за инвестиции Кирил Барбареев изјави дека денеска се запишале околу 1.200 во Штип, но и во остнатите наставни центри, каде што универзитетот има дисперзирани студии. Барбареев очекува да се запишат меѓу 3.000 до 4.000.
– Сметам дека идните студенти ќе ја препознаат иднината на некој од факултетите на универзитетот „Гоце Делчев“-Штип и ќе се запишат на некоја од 100-те студиски програми, рече Барбареев.
Вториот уписен рок на Универзитетот „Гоце Делчев“ е на 29-ти и 30 август, а третиот на 13 септември.