Во рамки на Струмичкиот отворен фестивал 2013, синоќа во Центарот за култура „Антон Панов” во Струмица беше промовирана збирка афоризми „Камче во чевелот” од Ацо Ѓоргиев.
За неговиот првенец зборуваше фолклористот и рецензент Иван Котев, кој истакна дека во афоризмите на Ѓоргиев е испреплетена актуелноста, традицијата, сарказмот и народниот дух.
– На 80 страници во преку четиристотини афоризми, тематски распределени во шест групи, младиот и докажан афористичар Ацо Ѓоргиев со сета силина на афоризмот како книжевен вид сурово ја отсликува реалноста на сегашното време. Оттаму и не случајно, неговото прво книжевно дело е насловено „Камче во чевелот”. Камче кое, верувам сите нас, како и афоризмите на Ацо, ни влегло во чевелот, во нашиот живот, не засмеало или успеало да не испровоцира. Ацо брилијантното ги искористува народните поговорки и филозофски мисли и ги прави неговите афоризми подиректни и посилни, рече рецензентот Иван Котев на промоцијата, на која за збирката зборуваше и Ана Витанова-Рингачева.
Авторот Ѓоргиев и се заблагодари на општина Струмица и на останатите покровители кои му помогнаа да ја објави својата прва збирка афоризми.