Јапонија подготви пакет кризни мерки во вредност од 13,2 трилиони јени (103 милијарди долари) за да ги ублажи ефектите од зголемените трошоци за суровините, а исто така подготвува мерки насочени кон прераспределба на богатството, изјави денеска премиерот Фумио Кишида.
Мерките ќе се финансираат главно од буџетските резерви за тековната фискална година, а ќе опфатат субвенции за трговците на големо со бензин и парична помош за домаќинствата со ниски приходи со деца.
Директните државни трошоци ќе изнесуваат 6,2 трилиони јени, а остатокот ќе бидат мерки за индиректни трошоци, како што се заемите за приватниот сектор.
– Владата ќе подготви и дополнителен буџет и ќе го „протурка“ во Парламентот за да ги надополни резервите и да обезбеди пари за борба против евентуалниот нов бран на Ковид-19 или за долг период на зголемени трошоци за гориво. Мораме да се погрижиме растот на трошоците за гориво и суровини да не го попречува закрепнувањето на економските и социјалните активности од пандемијата, наведе Кишида.
Тој најави и дека Владата по изборите за горниот дом на Парламентот ќе претстави и „сеопфатен“ пакет реформи во јапонското општество. Пакетот ќе вклучува чекори за да и помогне на Јапонија да постигне јаглеродна неутралност и да спроведе мерки на економската политика фокусирани на прераспределба на богатството.
– Треба да дејствуваме превентивно, на среден до долг рок, посочи Кишида.
Најавеното зголемено буџетско трошење во Јапонија е во спротивност со трендот во западните земји, кои постепено ги отстрануваат стимулациите од периодот на пандемската криза.
Извор: МИА