Американската Aгенција за храна и лекови (ФДА) воведе забрана за увоз на медикаменти од српската фармацевска компанија „Хемофарм“, затоа што во некои од нејзините ампули со инјекции е пронајдена опасната и во некои случаи смртоносна бактерија Burkholderia cepacia, објави белградскиот весник „Блиц“.
Според весникот, станува збор за резистентна и опасна бактерија која предизвикува заболување на белите дробови и може да биде опасна по човековиот живот.
Поради откривањето на оваа бактерија ФДА ја стави „Хеморфарм“, која е сопственост на германскиот концерн „Штад“, на листата на компании на кои им е забрането пласирње на производи на американскиот пазар се до отстранувањето на нерегуларностите.
Претставници во „Хемофарм“ за „Блиц“ изјавиле дека е прекинат извозот на лекови на американскиот пазар, но тврдат дека станува збор за раскинување на договорите со партнерите во САД поради „комерцијални причини“.
Извори во компанијата сепак ја потврдуваат информацијата за забраната на ФДА, нагласувајќи дека спорните шишенца не биле користени како амбалажа за инјекции наменети за домашниот пазар.
Тие тврдат дека во случајот не станува збор за неисправност на лековите, туку на празните ампули кои се полнат во погоните на „Хемофарм“. Тоа значи дека ампулите кои излегле од погоните на „Хемофарм“ биле инфицирани со бактеријата пред да стигнат до крајните потрошувачи, вели изворот на „Блиц“.
Весникот наведува дека напорите да добие информации од српското Министерство за здравство, односно од фармацевската инспекција околу контролата на квалитетот на лекарствата на „Хемофарм“ останале без резултати.
Вчера не добивме одговор на прашањето дали инспекцијата открила пропусти во производните хали на „Хемофарм“. За ова не сакаше да говори ни министерот за здравство Зоран Станковиќ, наведува „Блиц“.