Во Словенија освен поединечни случаи речиси и да нема бегалци од Украина, но хуманитарните установи, организации и владините служби за подготвуваат за евентуален бран луѓе од украинските региони зафатени со судирите.
Премиерот Јанез Јанша изјави дека земјата е подготвена на можен бегалски бран од Украина. На средба со раководство на Цивилната заштита Јанша рече дека во моментот не знае дали ќе се зајакнува бегалскиот бран со кој засега се соочуваат само соседните држави на Украина, како и оти Словенија досега добила барање за помош на 40-тина семејства што ја напуштаат Украина.
Првите бегалци во Словенија од Украина пристигнаа во понеделникот, конкретно две семејства на украински вработени во словенечка компанија од Велење што поставува систем за прочистување на води во украински Житомир.
Министерот за одбрана на Словенија, Матеј Тонин, синоќа изјави дека за украински бегалци се обезбедени 300 легла во местото Логатец, а унапред се регистрирани 80-тина потенцијални локации каде би можеле да бидат сместени деца-бегалци од Украина што би пристигнале без нивните родители.
Бројни хуманитарни организации, во најголема мера Црвениот Крст и Каритас, спроведуваат акции со апели и повици за материјална и парична помош за Украина.
Извор: МИА