Новиот германски канцелар Олаф Шолц денеска првпат ќе се сретне со рускиот претседател Владимир Путин со кого ќе разговара за украинската криза.
Предвидено е состанокот во Кремљ да трае неколку часа, а на крајот ќе се одржи заедничка прес-конференција, јави ДПА.
Посетата доаѓа во време кога германско-руските односи се на најниско ниво. Украинската криза најверојатно ќе засени неколку нерешени билатерални конфликти меѓу Берлин и Москва, коментира агенцијата.
За време на вчерашната посета на Киев Шолц рече дека сака да лобира кај Путин за деескалација на кризата во Украина. Тој го опиша распоредувањето на десетици илјади руски војници долж украинската граница како „несфатливо“.
Тој, исто така, ја предупреди Русија да не изврши напад врз Украина и нагласи дека ЕУ и САД се подготвени да одговорат со строги економски санкции.
Извор: МИА