Расчистуваа урнатини, извлекуваа повредени и санираа повреди. Ваква симулација на расчистување урнатини по земјотрес денеска изведоа волонтерите од Здружението за волонтерско работно и едукативно ангажирање во сферата на екологијата „Акцијаши“, на платото кај Старата железничка станица.
Нивната симулација е дел од програмата на Град Скопје за одбележување на 50-годишнината од катастрофалниот земјотрес што го погоди Скопје во 1963 година.
– Со нашите активности сакаме да испратиме порака за хуманост и за солидарност и да го популаризираме волонтерството меѓу нашите сограѓани, особено меѓу нашите најмлади – вели Горан Илиев, член на управниот одбор на „Акцијаши“.
Акцијашите во текот на вчерашниот ден кај градската плажа „Парк“ подигнаа камп за елементарни непогоди и ги почнаа активностите по повод одбележувањето на 50-годишнината од катастрофалниот скопски земјотрес од 1963 година.
Во кампот се сместени околу 150 волонтери и членови на бригадите што директно учествувале во расчистувањето на урнатините по скопскиот земјотрес, од повеќе делови на поранешна Југославија.
Утрово, во 05:17 часот акцијашите ги разбуди сирена, по што тие се упатија кон Старата железничка станица каде што изведоа симулација на расчистување урнатини по земјотрес, помош на настрадани и санирање повреди, во соработка со активистите на Црвениот крст на Град Скопје.