Министерот за економија Ваљон Сарачини денеска се сретна со претставници на канадската компанија „Резервоар Минералс“, Данкан Ларџ и Даниела Бомбај.
На средбата, како што информира ресорното Министерство, претставниците на канадската компанија биле информирани за поволните услови за инвестирање во секторот на минерални суровини, особено за металните минерални суровини, бакар, злато, сребро, олово, цинк, како и можните наоѓалишта во Македонија.
Сарачини посочил дека како дел од активностите за создавање поволна клима за инвеститорите се и измените на Законот за минерални суровини, притоа потенцирајќи дека сите законски измени што се прават произлегуваат од потребата на реалниот сектор.
Претставниците на канадската компанија биле информирани дека во постапка се и два јавни огласа за доделување концесии и тоа еден за концесија за експлоатација на термоминерална вода на две локации и вториот за концесии за детални геолошки истражувања на 29 локации.
– Во континуитет работиме на подобрување на бизнис климата и условите за работа, еднакво за домашните и странските компании, со цел поголем економски развој на Република Македонија и отворање нови работни места, истакнал министерот Сарачини, додавајќи дека зголемениот број на инвестиции во делот на минералните суровини е резултат на владините политики за привлекување инвеститори и создавање поволна бизнис-клима.
Според Даниела Бомбај од канадската компанија, со измените на Законот за минерални суровини и со самите процедури, Владата направила да има почесто тендери и да може компаниите да добиваат повеќе концесии.