Хрватскиот парламент денеска со убедливо мнозинство донесе закон за медицински потпомогнато оплодување, кој со месеци беше разгледуван и жестоко критикуван од опозицијата и Католичката црква.
За законот гласале 88 пратеници, 45 биле против, а двајца се изјасниле воздржано.
Според новиот закон секоја жена, независно во каква заедница живее, ќе може да изврши оплодување „ин витро“. Тоа се однесува и на лезбејските двојки и на жените без партнер, и покрај тоа што првичниот предлог бил законот да важи само за омажени жени или жени во вонбрачна врска.
Уште при внесувањето на предлог-законот хрватскиот министер за социјална политика и млади Миланка Опачиќ истакна дека тоа е „медицински закон, а не закон на еднополови заедници и секој што има проблем со неплодност, има право да ги користи сите можности гарантирани со законот“.
При разгледувањето на предлог-законот опозицијата предводена од Хрватската демократска заедница (ХДЗ) се изјасни против можноста жените без партнер да имаат право на оплодување „ин витро“. Католичката црква, исто така, го отфрли вештачкото оплодување.