Шпанската полиција денеска соопшти дека уапсила британски државјанин, еден од десетте најбарани криминалци во Европа. Брајан Чарингтон е осомничен дека раководел со организација за илегална трговија со дрога.
Тој е уапсен заедно со неговата пријателка и синот во рамките на полициската операција, при што се уапсени 13 луѓе во Шпанија и во Венецуела. Не е познато кога е уапсен Чарингтон, поранешен трговец со автомобили од Мадлсборо, Северна Англија.
Полицијата конфискувала 220 килограми кокаин од стан во Аликанте, Шпанија, како и банкарски сметки, имот и стоки во вредност од пет милиони евра.
Тоа било заедничка операција на шпанската полиција со безбедносните сили на Венецуела, на Колумбија, на Аргентина и на Велика Британија и со поддршка на јужноамериканската организација АМЕРИПОЛ.
Шпанија е популарна дестинација за британските криминалци, кои го користат недостатокот на договор за екстрадиција меѓу двете земји.