Пратениците му го простија долгот на јавното претпријатие „Македонски шуми“, тежок 43 милиони евра. Побарувањата на државата по основ на данок на додадена вредност, данок од добивка, персонален данок на доход, придонеси за пензиско и инвалидско осигурување, камати и обврски во јавното претпријатие „Македонски шуми“ ќе се претворат во траен долг.
Ова го одлучи владиното мнозинство во Комисијата за финансирање и буџет. Опозицијата беше против.
Заменик-министерот за финансии Ардијан Џеладини,ова го правдаше со потребата од непречено управување и поголема стабилност на претпријатието. Тој потенцира дека се работи за стар долг на претпријатието и оти по 2009 година тоа работи рентабилно и редовно ги исплаќа платите на вработените.
За опозицијата не е фер да му се простуваат долговите на јавното претпријатие од околу 43 милиони евра, а приватните компании да ги плаќаат редовно даноците.
„Ова што се случува ја покажува слабоста на власта да не најде менаџерски тим којшто ќе знае да управува со македонските шуми. Тие се национално богатство на Република Македонија. Досега не сме виделе некој да понесе одговорност“, рече Марјанчо Николов од СДСМ.