Едно лице е рането попладнево при престрелка во близина на аеродромот „Швехат“ во близина на Виена, соопшти австриската полиција.
Како што јави ДПА, повредениот е градежен претприемач, кој бил застрелан во ногата од страна на две маскирани лици, кои по инцидентот со црна лимузина побегнале во правец кон австриско-словачката граница.
Инцидентот се случил на автопатот во близина на аеродромот. Повредениот 49-годишен австриски државјанин бил застрелан додека се враќал од словачкиот главен град Братислава.
Во првичните извештаи за инцидентот се говореше за двајца повредени и дека тој се случил на аеродромот „Швехат“. Портпаролката на австриската полиција соопшти дека не станува збор за терористички напад.
Мотивите за нападот врз австрискиот градежник засега не се познати.