По четири недели снимање на брегот на Преспанско Езеро, екипата на филмот „Деца на сонцето“ на режисерот Антонио Митрикески ќе го продолжи снимањето во Скопје, Гостивар и Охрид.
Кон средината на неделава, ќе се снимаат сцени во Железничката станица во Скопје, во центарот на градот, во Жена-паркот, во едно казино и во приватна вила. Последните денови од снимањето се резервирани за Охрид, каде ќе се снимаат подводни сцени.
Режисерот Митрикески е задоволен од досегашниот тек на снимањето. Тој нагласува дека работи со извонредно добро организирана екипа која во целото негово искуство како режисер е најподготвена и најпрофесионална. Со снимањето се и понапред од планираното зашто, како што вели, стриктно се придржуваат на зададените планови.
– Земете предвид дека имавме масовни сцени по десетина актери во кадар, кои ги работевме во екстериерни услови, на зајдисонца, и сепак успевавме да ги снимивме во рок и да го фатиме тој величествен момент кога сонцето заоѓа и немавме потреба да доцниме или да преснимуваме.
– За искусните актери кои играат во филмот, немам коментар, тие се вистински магови во својата работа, како Владо Јовановски, Милица Стојанова (чија улога и е досега најголема на филм), Мето Јованоски, Билјана Танески, босанската ѕвезда Емир Хаџихафизбеговиќ, Данчо Чеврески, Александар Микиќ, Камка Тоциновски, а младата актерка Ивана Павлаковиќ, која ја игра главната улога и која наедно дебитира на филм, е големо откровение за мене.
– Чудо од актерка. Допрва ќе се слуша за неа. Таа ги надмина моите очекувања. Не можам, а да не го споменам и младиот актер нејзин партнер во филмот Кире Ѓоревски, кој исто така многу автентично го пресликува ликот на Марко. Феноменален е, изјави Митрикески.