Францускиот амбасадор во Србија, Франсоа Гзавије Денио, вели дека преговорите на Србија за членство во ЕУ ќе започнат помеѓу состаноците на Европскиот совет од 20-ти декември и 31-ви јануари. Според него сега е најважно Србија добро да се подготви.
-Одлуката за започнување на преговорите е донесена. Но доколку е потребно повторно да се слушне Европскиот совет во декември, можам да кажам дека преговорите ќе започнат помеѓу состаноците од 20-ти декември и 31-ви јануари-наведе тој.
На прашањето што значи терминот „потполна нормализација на односите со Косово“одговори дека тоа значи „конкретна, одржлива и видлива примена на договорот помеѓу Белград и Приштина од април и мај годинава“.
Францускиот дипломат нагласи дека тој термин не значи признавање на Косово, наведувајќи дека тоа го нема во договорите и потсети дека пред секоја важна одлука на Европскиот совет, се одржуваат француско-германски состаноци, поради посебен партнерски однос на државите.
Тој додаде дека Париз не се сомнева дека српската влада е подготвена да го примени она што го потпишала, односно Бриселскиот договор.
Елена Георгиевска