Суштината на спорот меѓу Северна Македонија и Бугарија нема ништо со процесот на евроинтеграција. ЕУ е систем кој што прифаќа разновидност и мултиперспективност. Нема ништо со исполнување на политичките и економските критериуми од Копенхаген. Се бави со прашања коишто се целосно внатрешни, прашања на земјата како јазикот е право што произлегува од правото на самоопределување на земјата.
Ова го истакна министерот за надворешни работи, Бујар Османи на панел дискусијата насловена „Југоисточна Европа: Зајакнување на мирот и безбедноста во кревка глобална средина”, во рамки на конференцијата Самит на Западен Балкан – „Промовирање на инклузивноста и солидарноста во Европа”, што се одржува во Скопје, во организација на престижниот магазин “The Economist”.
Тој додаде дека постојат повеќе патеки на кои што работиме во однос на надминување на спорот. Билатералната во рамки на која се работи на спроведување на Договорот за доброседство, и европскиот пат и позицијата на прашањето во процесот за интеграција во ЕУ при тоа го повтори ставот дека билатералните прашања не треба да бидат дел од процесот на проширување.
-Што се однесува до прашањето на јазикот имаме во моментов предлог од претседателствата и германското и португалското, преземен и од словенското и тоа е сеуште активен предлог и според нас тоа е добра основа за изнаоѓање решение. Од неодамна можам да видам и еден премин од наративот што ја поддржува идејата на наметнување апсолутна вистина и мешање во правото на луѓето да го прифатат тој наратив и предлогот 5+1 на последниот состанок за воведување на бугарската заедница во нашиот Устав за да ги имаат сите права за зачувување на својата култура, идентитет и историски атрибути. Мислам дека Северна Маскедонија е позната по признавање на правата на заедниците слободно да ги изразуваат своите атрибути и тоа е патот напред на кој што работиме, рече Османи во одговор на прашање.
Министерот Османи во своето обраќање меѓу другото, ги истaкна чекорите преземени од страна на нашиот регион во насока на доближување кон Европската унија, преку формирање заеднички регионален пазар и направениот исчекор кон зелена и дигитална трансформација, што од своја страна придонесува за одржливиот развој на самата ЕУ.
–Економскиот и инвестицискиот план за Западен Балкан оди рака под рака со кредибилната политика на проширување на ЕУ. Доколку нема напредок во однос на досието на Северна Македонија оваа зима, тоа негативно ќе се одрази врз кредибилноста на ЕУ. Најевтината инвестиција за заживување на европската перспектива е преку преземање конкретни чекори кон секоја од земјите во регионот, истакна Османи.
Министерот Османи се осврна и на членството на Северна Македонија во НАТО, оценувајќи го како успешен и заемно корисен пример за безбедноста на земјава и Алијансата. При тоа упати порака дека не постои дилема дека прогресот на нашиот пат кон ЕУ ќе биде од заемна корист за земјава, регионот и за Унијата како целина.
На панелот се обратија и амбасадорката на САД Кејт Мери Брнз и други високи претставници од регионот и академската заедница.