Општина Гевгелија ќе биде организатор и домаќин на меѓународен кошаркарски турнир што ќе се одржи на почетокот од септември годинава.
Ова беше договорено на денешната средба на градоначалникот Иван Франгов со претседателот на Кошаркарскиот сојуз на Србија, Драган Томашевиќ, со директорот на „Партизан“ од Белград, Драган Тодориќ и со претседателот на гевгелискиот прволигаш „Кожуф“, Томица Главчев, кој е домаќин на високите гости од српската кошаркарска федерација.
По средбата беше соопштено дека домаќин на турнирот ќе биде „Кожуф“, а досега учеството го потврдиле елитните кошаркарски екипи „Партизан“ од Белград и „ПАОК“ од Солун. Гостите на градоначалникот Франгов му подарија дрес на „Партизан“ со неговото име.