По ненадејното и големо зголемување на бројот на нови случаи на Ковид-19, некои шпански региони постепено се затвораат.
Повторно нема да работат затворените дискотеки, се ограничува работното време на продавниците, како и бројот на клиенти и се воведува полициски час.
Каталонија, епицентарот на петтиот бран на пандемијата, се подготвува да побара од регионалното судство зелено светло за воведување полициски час во најпогодените градови, вклучително и Барселона, пренесуваат каталонските медиуми.
Затворените дискотеки нема да работат најмалку 15 дена, додека негативен антиген или ПЦР тест е неопходен за да присуствувате на настани на отворено каде што се собираат повеќе од 500 луѓе.
Други региони презедоа или подготвуваат слични мерки. Валенсија повторно воведе полициски час од 1 до 6 часот наутро и го ограничи бројот на 10 луѓе при собири во 32 места со повеќе од 5.000 жители.
Владата на Канарските острови исто така сакаше да преземе слични мерки, а беше спречена од локалното судство.
Многу позаразната делта-варијанта предизвика експоненцијално зголемување на случаите во последните неколку недели, претежно кај младите луѓе.