Македонска владина делегација, предводена од премиерот Никола Груевски, од денеска ќе престојува во посета на Народна Република Кина.
Владината прес-служба соопшти дека во тек на посетата премиерот Груевски во Пекинг ќе има средби со претседателот и со премиерот на Народна Република Кина, Си Џипинг и Ли Кечианг.
Груевски, кој ќе биде придружуван од министрите за надворешни работи и за привлекување странски инвестиции, Никола Попоски и Веле Самак, задутре ќе се обрати на Конференцијата за соработка меѓу НР Кина и земјите од Централна и Источна Европа, што ќе се одржи во кинескиот град Чонгкинг.
– Се работи за иницијатива поттикната од кинеската Влада, а организирана од кинеското Министерство за надворешни работи и локалната самоуправа на Чонгкинг чија цел е интензивирање на економската и политичката соработка на Народна Република Кина со земјите од Централна и Источна Европа, се вели во соопштението.
Во тек на економската турнеја за привлекување инвестиции, премиерот Груевски и владината делегација, според најават, ќе остварат и повеќе поединечни средби со претставници на кинески компании од различни сектори кои се потенцијални инвеститори во нашата земја.